मागे मुंबई दौऱ्याचा वेळी त्यांनी असाच लोकल प्रवासाचा स्टंट केला होता. मुंबईत लोकलमधून फुल्ल सिक्युरीटीसह एक छोटा प्रवास करणे ही काही राज्य सरकारविरुध्दची लढाई नाही किंवा लोकल प्रवाशांच्या लढ्यात टाकलेली उडी नाही. त्यामुळे बऱ्याच प्रवाश्यांनी त्यांच्याकडे दुर्लक्ष केले, काहींनी ही स्टंटबाजी लक्षात घेऊन रोजच्याप्रमाणे आपले कामाचे ठिकाण गाठणे पसंत केले. याचे कौतुक होते फक्त मिडीयाला आणि कॉंग्रेसवाल्यांनाच. याउलट जे समस्त मुंबईकर दररोज न चुकता ही धक्केबाजी आयुष्यभर सहन करत आलेले आहेत व आजही करताहेत त्यांच्या जखमेवर फुल्ल सिक्युरीटीसह लोकल प्रवास करुन राजकुमारांनी मीठ चोळले आहे, या वस्तूस्थितीची जाणीव राजकुमारांना करून देण्याचे धाडस कॉंग्रेसमधील एकाही बुजुर्गाने दाखविले नाही.

पाच दहा मिनिटे लोकांमध्ये जाऊन मिसळणे, लोकलने एखादा प्रवास करणे, एखादी मातीची पाटी उचलून टाकणे, एखाद्या गरीबाच्या झोपडीत घरात जाऊन जेवण घेणे आणि आता शेतकऱ्यांसोबत आंदोलनात सहभाग घेणे ही नाटके राहुल गांधी फक्त कोंग्रेसेतर राज्यातच का करतात? काँग्रेसची सरकारे असलेल्या राज्यात राजकुमारांना यातील एकही समस्या दिसत नाही का? केवळ आगामी निवडणुका डोळ्यासमोर ठेवून राजकुमारांची ही स्टंटबाजी चालू आहे, हे न समजण्याइतपत जनता काही खुळी नाही. (पण मतदान करताना सर्वसामान्यांचा हा त्वेष कुठे लुप्त होतो हेच समजत नाही.)

राहुल गांधींना त्यांच्यावर होत असलेला हा स्टंटबाजीचा आरोप जर मान्य नसेल, तर त्यांनी हा आरोप खोडून काढण्याची सुरुवात म्हणून केवळ महाराष्ट्रच आपल्या या महान कार्यासाठी दत्तक घ्यावा. येथील शेतकरी, कष्टकरी, शेतमजूर, गिरणी कामगार, व्यापारी, नोकरदार, विद्यार्थी, महिला या सर्वांचे प्रश्न सोडविण्याचे धाडस त्यांनी दाखवावेच. केवळ काँग्रेसची सत्ता नसलेल्या राज्यात जाऊन ही स्टंटबाजी करण्याऐवजी, राजकुमारांनी सर्वप्रथम काँग्रेसची सत्ता असलेल्या राज्यातील जनता विविध समस्येखाली कशी पिचून चालली आहे याकडे लक्ष देऊन, आपल्याच पक्षाच्या सरकार विरुद्ध एल्गार पुकारण्याची हिंमतसुद्धा त्यांच्यात आहे हे त्यांनी आता एकदा सिद्ध करावेच.